Eluru:అర్ధరాత్రి సామాన్యుడిలా యంగ్ డీఎస్పీ.. సడన్ ట్విస్ట్ అదుర్స్..!

చాలా సినిమాల్లో చూసి అనుకుంటాం.. మన ఊర్లో కూడా పోలీస్ ఆఫీసర్ మఫ్టీలో వచ్చి సడన్ ట్విస్ట్ ఇస్తే అదిరిపోద్ది కదా అని.. ఆ అవన్నీ సినిమాల్లోనే అనుకుంటూ థియేటర్ నుంచి బయటకొచ్చి వాటిని వదిలేస్తుంటాం.. సడన్ ట్విస్ట్‌లు సినిమాల్లో కాదు రియల్ లైఫ్‌లోనూ ఉంటాయని ఓ యంగ్ డైనమిక్ డీఎస్పీ చూపించారు.

పశ్చిమగోదావరి జిల్లా కేంద్రం ఏలూరులో ఇటీవల దొంగతనాలు, అర్ధరాత్రిళ్లు తాగి గొడవలు చేస్తూ ప్రాణాలు పోగొట్టుకోవడాలు ఎక్కువైపోయాయి. దీంతో డీఎస్పీ దిలీప్ కిరణ్ నగరంలో అర్ధరాత్రి ఆకస్మిక తనిఖీలు చేపట్టారు. బైక్ పై నగరం మొత్తం తిరుగుతూ నైట్ షిఫ్ట్ పోలీసులకు సడన్ ట్విస్ట్ ఇచ్చారు.

అర్ధరాత్రి అనుమానాస్పదంగా తిరుగుతున్న వారి వివరాలు కనుక్కొని ఈ టైంలో ఏం చేస్తున్నారని ప్రశ్నించారు. అదేవిధంగా నైట్ డ్యూటీలో విధులు నిర్వహిస్తున్న సిబ్బందికి ఎలా పనిచేయాలో సూచనలు ఇచ్చారు. నేరాల నియంత్రణలో భాగంగా ఇలాంటి ఆకస్మిక తనిఖీలు ఇక రెగ్యులర్‌గా ఉంటాయని డీఎస్పీ కిరణ్ చెబుతున్నారు.