విశాఖ జిల్లా గాజువాకలోని పంతులుగారి మేడ వద్ద గల సింహాద్రి ఆటో ఏజెన్సీ హీరో షోరూంలో మంగళవారం మధ్యాహ్నం అగ్నిప్రమాదం జరిగింది. ఈ ప్రమాదంలో 15 బైక్‌లు దగ్ధమయ్యాయి.
బ్యాటరీ బైక్ షోరూంలో అగ్ని ప్రమాదం సంభవించి బైకులు దగ్ధమయ్యాయి. ఓ బైక్ బ్యాటరీ చార్జింగ్‌లో ఉండగా ఈ ప్రమాదం చోటుచేసుకుందని నిర్వాహకులు చెబుతున్నారు. విశాఖ జిల్లా గాజువాకలోని పంతులుగారి మేడ వద్ద గల సింహాద్రి ఆటో ఏజెన్సీ హీరో షోరూంలో మంగళవారం మధ్యాహ్నం ఈ అగ్నిప్రమాదం జరిగడంతో స్థానికులు ఒక్కసారిగా భయబ్రాంతులకు గురయ్యారు.
అగ్ని ప్రమాద సమాచారం అందుకున్న ఫైర్ సిబ్బంది ఘటనా స్థలికి చేరుకొని మంటలను ఆర్పేశారు. అయితే, అప్పటికే 15 కొత్త బైకులు కాలి బూడిదయ్యాయని.. సుమారు రూ.20 లక్షలు ఆస్తి నష్టం సంభవించినట్లు షోరూం యజమాని సింహద్రి తెలిపారు. షార్ట్ సర్క్యూట్ కారణంగానే ఈ ప్రమాదం జరిగిందని షోరూమ్ నిర్వాహకులు చెబుతున్నారు.
ఘటనపై పలు అనుమానాలు వ్యక్తమవుతున్నాయి. ఘటన జరిగిన సమయంలో షోరూమ్ మూసివేసి ఉందని సిబ్బంది చెప్తున్నారు. పగటి సమయంలో ఎందుకు మూసేయాల్సి వచ్చింది? షోరూమ్‌లో బ్యాటరీ ఛార్జింగ్ పెట్టడానికి ఏర్పాట్లు ఎలా ఉన్నాయి? షార్ట్ సర్క్యూట్ ఎలా జరిగింది? తదితర వివరాలను కనుగొనే పనిలో పోలీసులు ఉన్నారు.
